Senli günler Şiiri - Sevinc Arzulu

Məni gözü yaşlı qoyub,
Gözdən itdi sənli günlər.
Yəqin artıq məndən doyub,
Daha bitdi sənli günlər.

Təkcə qaldım yer üzündə,
Çəmənində,çöl-düzündə.
Qəm oxuram,yar,gözündə.
Nələr etdi sənli günlər.

Zirvəyəm,çəndən xəbərsiz,
Hörüyəm,dəndən xəbərsiz.
Bir gün də məndən xəbərsiz,
Sona yetdi sənli günlər.

Dağ başında tülə dönüb,
Al çiçəyə,gülə dönüb.
Gözəl qızılgülə dönüb,
Düzdə bitdi sənli günlər.

Sevinc sənə nəğmə qoşar,
Kədər,möhnət qəlbdə yaşar.
Dönüb gözəl qaranquşa,
Uçub getdi sənli günlər.