Şehenşâh-i Mu’azzam Tâcdâr-i Kişver-i ‘Âlem

Şehenşâh-i mu’azzam tâcdâr-i kişver-i ‘âlem
Sikender-taht ü Dârâ-baht ü Husrev-raht ü Kisrâ-dâd

Cenâb-i pâdşâh-i bahr ü ber hân Ahmed-i sâlis
Kim oldı emrine ser-cümle şâhân-i cihân münkâd

O şâhenşâh-i heft-iklîm kim şevketle devletle
Selâtîn-i ‘izâmı dergehinde itdi isti’bâd

Hudâvend-i hıred-çâker cihânbân-i Ferîdûn-fer
Şeh-i rûşen-güher revnak-dih-i dîhîm-i isti’dâd

Penâh-i dîn ü devlet muktedâ-yi fırka-i ümmet
Rehîn-i cûd ü himmet tekye-sâz-i mesned-i ecdâd

Cihân-dâver bihîn-hâkân-i çerh-evreng-i mihr-efser
Hünerver-pâdşâh-i bî-nazîr ü mekrümet-mu’tâd

Gubâr-i âstânı kîmiyâ-bahş-i sa’âdetdür
Kemîne-gerd-i râhı kuhl-i çeşm-i zümre-i emcâd

Hazîz-i südde-i rif’at-me’âbı evc-i istiklâl
Kenâr-i âstânı bâliş-i âsâyiş-i efrâd

O şâhenşeh ki virmişdür ana hallâk-i bî-hemtâ
Kemâl-i rüşd ü idrâk ü vakâr ü ‘akl ü isti’dâd

Misâl-i şîr ü şekker fıtratı hikmetle âgaşte
Fetânetle sirişt-i pâkini Hakk eylemiş îcâd

Şümâr olmak ne mümkin tab’-i derrâkindeki fıtnat
Nihâdında kemâlâtı degüldür kâbil-i ta’dâd

Husûsâ tarh bünyâd eylemekde tab’-i çâlâki
Hakîmâne mühendis-pîşe-i eslâfdan müzdâd

Ne imiş tarh-i üstâdâne-i tab’-i hümâyûnı
Bilür bu kasr-i zîbâyı temâşâ eyleyen üstâd

‘Aceb zîbende resm-i dil-keş oldı pâdşâhâne
Müferrih sahn-i Kâgıd-hânede bu kasr-i nev-bünyâd

Ne cânı var nukûş-i tâkını resm eyleye Mânî
Ne kâdir kıl kalemle itmege tasvîr anı Bih-zâd

Bu kasrun var ise cennetde bilmem şibh ü mânendi
Hele dünyâda nâ-mümkindür itmek mislini inşâd

Süleymân tahtıdur kim çâr ejder pâsbân olmış
Karîb olmak ne mümkin ana keyd-i dîde-i hussâd

N'ola dil dökse her bir lûlesi havzeynine dâ’im
Lisân-i hâl ile olmakda gûyâ-yi mübârek-bâd

Şehenşâh-i cihânı tûl-i ‘ömr ile safâlarla
Derûnında ide hallâk-i ‘âlem dâ’imâ dil-şâd

Didüm tekmîl ü itmâmında ilhâm-i İlâhîden
İderken mısra’-i târîhinün inşâdın istimdâd

Bu iki mısra’un her biri târîh oldı ey Sâmî
İdince mısra’-i sânîye evvel mısra’ı imdâd

Ferah-zâ kasr-i Sa’d-âbâd-i sultân Ahmed-i ‘âdil
Bu nev-kasr ola sultân Ahmedün tarhıyla sa’d âbâd

Sene 1134