Hiç sorma mübtelâlarun ahvâli bellidür
Sen bî-vefâya dil virenün hâli bellidür
Gördük kitâb-ı hüsnini tâ âhırına dek
Mazmûn-ı ser-güzeşt-i hat u hâli bellidür
Dâgından anla ehl-i dilün hasb-ı hâlini
Remmâl-i ‘aşk kur‘asınun fâlı bellidür
Mir’ât-ı şerr u hayr-nümâdur zamânemüz
Dikkat olunsa herkesün ahvâli bellidür
Mümtâz ider mülâyemet-i tab‘-ı âdemi
Hindün ne denlü sâde ise şâlı bellidür
..
Kim ola devlet-i pâ-bûsuna mecâli ola
Meger ki sûret-i bî-cân-ı nakş-ı kâli ola
Hased o ‘âşıka kim pîr-i sâl-hûrde iken
Felekde gün gibi bir şûh-ı hurde-sâli ola
Virür mi sâkî-i devrân bu köhne meykedede
Bana piyâle-i ‘işret meger ki hâli ola
Huşâ o haste-i hicrân ki pister-i gamda
Tabîb-i müşfikı emrinde imtisâli ola
Olur mı hıfz-ı nigeh rû-yı hûbdan Âgâh
‘Ale’l-husûs ki hüsnünde i‘tidâli ola
..
