Rubâ’îler Şiiri - Arpaeminizade Sami

1
Sözdür olan ârâyiş-i mecmû’a-i cûd
Sözden düzilür dü-mısra’-i bûd ü ne-bûd
Söz olmasa kâf ü nûn ile cilve-nümâ
Gelmezdi bu kâ’inâta âsâr-i vücûd
2
Bâkînün idüp meşreb-i ‘asrı üzre
Tâk-i kalemi hûşe-i eş’ârı bedîd
Çün neş’e-i tâze mey-i köhne henûz
Ma’nâ-yi kühen-lafz ü ‘ibârâtı cedîd
3
Ol sâhib-i kibr ü nahvet ü bugz ü hased
Kim makdemidür belâ-yi her mısr ü beled
Fir’avn ile hem-zebân-i da’vî-i galat
İblîs ile şâyeste-i nefrîn-i ebed
4
İmsâk-i vefâ ‘âdeti bir mâye-i nûr
Virdi dile çün rûze cefâsıyla fütûr
Şâm-i hat-i nev gelince öpdürdi lebin
Hengâm-i gurûb eyledük zevk-i fatûr
5
Ey tâlib-i kurb-i hâlik-i cinn ü beşer
Kıl şirk-i celîdinde hafîdinde hazer

6
İshâk gönül olalı sana müştâk
Pür oldı sadâ vü nâlemüzle âfâk
Şeb tâ-be-seher itmede Fâ’ik feryâd
Bir pây ile mânende-i murg-i ishâk
7
Tedbîr ü tasarrufda o kec-re’y ü rekîk
Mervân-i hımârun halefi çü mürde-rîk
Her kârda kethudâ-yi murdârı ile
Mânend-i husyeteyn-i har oldı şerîk
8
Bir âfet-i dil-firîbe meftûn oldum
Şemşîr-i cefâ ile ciger-hûn oldum
Zencîr-be-gerden-i firâk itdi beni
Pehnâ-yi fezâ-yi gamda mecnûn oldum
9
Allâhdan özge yok hakîkatda hakîm
Mü’min bunı bi'z-zarûrî eyler teslîm
Eflâk muharriki yed-i kudret iken
Pek zâhirdür dürûg-i ehl-i tencîm
10
Mehcûrî-i cân itmede ey şûh-i cihân
Hemvâre nukûd-i eşk-i çeşmi rîzân
Hûn-âbe-feşânî-i dil-i pür-gam ile
Müjgânlarum oldı şâhsâr-i mercân
11
Ey nahvet-i câh ile olan gûşe-nişîn
Ebrûda girihle tâ-be-key çîn-i cebîn
Âhir felek ebruvânun eyler gözün aç
Çün na’lçe zîr-i kefş-i idbâra karîn
12
Yenbû’-i vücûd ya’nî ser-çeşme-i hû
K'olmış bu nigûn tâs anunla memlû
Feyzinde anun buhl bulınmaz ammâ
Her kişi alur âbını mikdâr-i sebû
13
Rûyında görüp sebz hat-i ma’şûkı
Pâ-zehr ile yâd itmeyelüm Fârûkı
Her zâhid-i mâr-hilkatün kûrligine
Ey dil görelüm zümürrüd-i meshûkı
14
Ol şûh-i cihân bana dirîgâ yâd oldı
Gönlüm gam ü endûh ile nâ-şâd oldı
Ma’mûre-i dil seng-i cefâdan hayfâ
Kâşâne-i bûm misâl ber-bâd oldı