Qarıyar yeni Şiiri - Sevinc Arzulu

Istərsən ayrılıq köçündə düzlən,
Dünyanın yoxunda, heçində izlən.
Gündüzlər didəmin içində gizlən,
Gecələr kirpiyim qoruyar səni.

Sinədə bir ürək, iki candılar,
Birgə alışdılar, birgə yandılar.
O qədər istəkli, mehribandılar,
Duman qucaqlayıb sarıyar çəni.

Vüsalın önündə hicran heçsə də
Tək məni özünə həmdəm seçsə də.
Aradan əlli il, yüz il keçsə də
Ayrılıq qocalıb qarıyar yəni...