Ölüyem sensiz Şiiri - Sevinc Arzulu

Fələk yenə başa dönüb,
Acılarım yaşa dönüb.
Duyğularım daşa dönüb,
Mən elə ölüyəm sənsiz.

Uduzmuşam oynunda ki,
Haqqın vardır boynumda ki.
Üşüdürəm qoynumdakın,
Qarlı dağ çölüyəm sənsiz.

Düşübmüdür izə, bilmir,
Çatacaqmı bizə, bilmir.
Bircə sona üzə bilmir,
Donmuş qış gölüyəm sənsiz.

Bir atımlıq varmış canı,
Sökülməz ki daha danı.
Dadlı gəlir hicrin qanı,
Somsoyuq zəliyəm sənsiz.

Dərdi xeyli-deməsinlər,
Varmış meyli-deməsinlər.
Mən Leyli deməsinlər,
Məcnun tək dəliyəm sənsiz.

Nə biləsən acımdakın,
Nə də son əlacımdakın.
Quşlar yedi ovcumdakın,
Vəslin boş əliyəm sənsiz.