Olmur Şiiri - Sevinc Arzulu

Sevib-seçdin,eh,sən kimi,
Dağlıbdır vəslin himi.
Üzə durub hicrin simi,
Azacıq çalmasam olmur.

Ağlı yoxdur cahilin də,
Gözü toxdur sailin də.
Göy Xəzərin sahilində,
Xəyala dalmasam olmur.

Addımlayıb keç qumsalı,
Odur ayrılıq timsalı.
Körpə uşaqdır vüsalın,
Qeydinə qalmasam olmur.

Umduğum saf eşqin olub,
Həsrətinsə çaşqın olub.
Uçqun olub, daşqın olub,
Yeni yol salmasam olmur.

Təzə libasın geydiyim,
Duz ilə çörək yediyim.
Məndən küsüb dost dediyim,
Könlünü almasam olmur.