Nizâmü'l-mülk-i ‘Âlem Sadr-i Zî-şân Sâhi ...

Nizâmü'l-mülk-i ‘âlem sadr-i zî-şân sâhib-i devlet
Ki dergâh-i refî’inde e’âlî çihre-fersâdur

Vekîl-i mutlak ü dâmâd-i sultân Ahmed-i gâzî
Ki zât-i bî-nazîri mu’tenâ-yi dîn ü dünyâdur

Vezîr-i bî-müdânîdür hudâvend-i mu’azzamdur
Melek-hûy-i mükerremdür Felâtûn-re’y-i dânâdur

Cemâl-i şâhid-i idrâkine ‘akl ü hıred meftûn
Derûn-i pâki mir’ât-i Sikenderden mücellâdur

Cenâb-i sadr-i ‘âlî-rütbe İbrâhîm paşa kim
Hazîz-i âstânı evc-bahş-i çerh-i vâlâdur

O verd-i bî-hazân-i gülsitân-i devlet aslında
Teberdârân ocagından şüküfte zât-i yektâdur

Ocakdan şu’lelendi meş’al-i şeh-râh-i ikbâli
Ezelden reh-ber-i güm-kerde-râhân-i temennâdur

Tulû’-i evvelinden kevkeb-i iclâlinün hâlâ
Fürûg-i şeb-çerâg-i himmeti günden hüveydâdur

Ocak halkın çerâg itmişdi yek-ser şem’-i ikbâli
Anunçün mûm olup kullukda her kes şimdi ber-pâdur

Degül ancak ocaklı mazhar-i envâr-i ihsânı
Toyurdı ‘âlem-i halkı ‘atâsı hân-i yagmâdur

Bu hengâma gelince tâ o demden ol kerem-kârun
Semâhat kârı himmet ‘âdeti cûdı müheyyâdur

Cibillîdür ana lutf ü kerem hakkâ cibillîdür
Secâyâdur ana cûd ü sahâ el-hak secâyâdur

Muhassal gelmemişdür böyle sâhib-cûd âfâka
Vücûd-i pâk-i bî-mânendi mahz-i lutf-i Mevlâdur

Emânet sana yâ Rabbî emânet zât-i memdûhı
Hatâlardan vücûdın sakla yâ Allâh ü yâ kâdir

O sadr-i kâm-rân kim şîme-i müstahseni çünkim
Teberdârâna dâ’im re’feti bî-hadd ü ihsâdur

Olup mi’mâr-i çâbük-dest-i cûd ü himmeti der-kâr
Bu def’a dahı lutfı anlarun hakkında peydâdur

Olınca muhterik bünyâdın emr itdi sa’âdetle
Bu mevzi’ kim teberdârâna râhatgâh ü me’vâdur

Harîkun işti’âli bagteten tâkat-güdâz oldı
Ocak erbâbınun fart-i hasârı âşkârâdur

Mükâfât itdi cûş-i mevc-i bahr-i lutf ile hakkâ
Ki nâr-i gussayı hâtırlarından kasdı itfâdur

Muvaffak oldı bünyâd itmege bu meymenetgâhı
Anun her kârda bî-şek mu’îni Hak te’âlâdur

Virüp Eski Serâya tâze revnak Âsaf-i devrân
Bu vâlâ câygâhı yapdı kim bî-misl ü hemtâdur

Bu hayr-i pâk ü bu zîbâ eserle nâm-i nîkûsı
Eger mezkûr olursa haşre dek şâyân ü ahrâdur

Bu ra’nâ tarh-i dil-keşle bu nâzük resm ile şimdi
Ota dinmeklige şâyeste bir cây-i dil-ârâdur

Bunun gibi nice âsâra Hak tevfîk ide zâtın
Ki dâ’im niyyet-i pâkîzesi ta’mîr-i dünyâdur

Hudâ bünyâd-i câhın eyleye ma’mûr ü âbâdân
Ki hemvâre der-i devlet-me’âbı halka melcâdur

İdince gûş tekmîlin didüm târîhin ey Sâmî
Bu tarh-i pâk nev-bünyâd-i İbrâhîm paşadur

Sene 1138