Nigeh Mümkin Mi Gül-çîn Ola Ruhsâr-i Dil ...

Nigeh mümkin mi gül-çîn ola ruhsâr-i dil-ârâdan
Zihâm-i fevc fevc-i nûr-i enzâr-i temaşâdan

Fezâ-yi râstîde sâk-i sıdkı eyleyen teşmîr
Olur rif’atle berter nahl-i şîrîn-magz-i hurmâdan

Felek nakdîne-hâh-i eşk-i mahrûmî-i hâtırdur
Harîdâr-i metâ’-i reste-bâzâr-i temennâdan

Eser eyler mi kanda nîş-i zehr-âlûde-i zenbûr
Gider mi lezzet-i nazmum zebân-i dahl-i bî-câdan

Olur hem-dûş-i ‘izzet ‘âkıbet dil-beste-i mihnet
Nümâyândur bu ma’nâ bestegî-i teng-i kâlâdan

Amân bilmez yine tîr-i kazâ-te’sîr-i müjgânı
Dehân-i şekvedür yek-pâre ten zahm-i ser-â-pâdan

Tabasbus ittihâd-i sâf-tab’âna delîl olmaz
Görür mînâ-yi meclis çîn-i cebhe mevc-i sahbâdan

Hakîkatle mecâzun asl ü fer’in bildi pervâne
Görindükçe dü şu’le pertev-i fânûs-i mînâdan

Olınca Râgıb-i pâkîze-gûya pey-rev ey Sâmî
Sadâ-yi âferîn-bâd oldı zâhir şahs-i ma’nâdan