Nedür Ol Turfe Şahs-i Lâgar-ten

Nedür ol turfe şahs-i lâgar-ten
Hîç sakınmaz gözini budakdan

Bî-muhâbâ uçup gezer her bâr
Nâra pertâb ider semendervâr

Bir ocak-zâdedür bihîn-sîmâ
Dâ’imâ âşinâ-yi bay ü gedâ

Başa sayf ü şitâ takar sünbül
Âsmânî belâdur ol şengül

Pîş-i şâhânda itse reftârı
Kefşden pâyın eylemez ‘ârî

Pîç ü tâb anı şöyle almışdur
Ayagı bir çukurda kalmışdur

Velî çirk-i riyâdan olsa harâb
İtdürürler o şahsa nûş-i şarâb

Gâh sâcid gehî kıyâm-âver
Ekserî nev-cevân imâma uyar

Bu lugaz sırrın anlayan cânun
Âferîn tab’-i pâkine anun