Min Dît Şiiri - Ziza Rumas

Min dît bejnek ji ezel wir ve
Tevî meş û wezna kihêlî
Giyan têxist di ser laşî ve
Rakir bire nav dehl û dêlî

Min dît tayek da di dest de
Ji wê çêbû biskên gulgulî
Tilî gerand di jêr wan de
Xuya kirin bijang ji têlî

Min dît bînek ji bîbikan ve
Roniyek hat li nav du çalî
Bêhnê kêşa ji axa sar ve
Kanî der bû bêhn dît bêvilî

Min dît pistîn di gera lêv de
Ba guherî da guhên belî
Maçek danî di nav du dêm de
Pêkhatin lêv kir qîr û gilî

Min dît livê ji hêza wê ve
Tevger dîtin du ling û milî
Rabû ser xwe da bi dû xwe ve
Jînê da jîn li her çar alî

Min dît du hok hatin ji wê de
Serî mûç in bi xeml û xêlî
Kaş û gelî li nava wan de
Star û warê teyr û xezalî

Min dît agir bi serê wan ve
Mîna newroz felat delîlî
Xortan gavan pîva ji dûr ve
Kesî negirt ne pêt û pêlî

Min dît avek di çaviyê de
Lê mijiyam ji her dor hêlî
Rengê berfê di dirûv wê de
Bû kan û can hat şîrê dolî

10.11.2015
Silîva