İtmez kenâr-i matlaba gevher nisâr mevc
Tâ olmayınca zillet ile hâksâr mevc
Ta’dâd-i lutf-i nâ-mütenâhî-i Hak muhâl
Olsun mı hîç sahîfe-i yemde şümâr mevc
Ser virmedin telâtum-i râz olmaz âşkâr
Kat’ olmayınca zâhir ider mi çenâr mevc
Keştî-i tab’ı garka-be-nûr-i neşât ider
Virdükçe sebzezâra nesîm-i bahâr mevc
Olur kenâre-gîr-i tevekkül gınâ-pezîr
Bendergeh-i sevâhile baglar katâr mevc
Virmez binâ-yi fakra halel cûş-i hâdisât
Gark idemez kemîne hası sad hezâr mevc
Vaz’-i hilâf-i ehl-i kerem hikmet üzredür
Geh medd ü gâhî cezr ider âşkâr mevc
Pâ-bûs-i yâre teşne leb-i cûybârda
Ta’kîb idüp biribirin itmez karâr mevc
Çeşm-i habâbına tokunur meşrebi budur
Gerçi bulur müsâ’ade-i rûzgâr mevc
Zencîre çekdi ‘aklı perî gibi şîşede
Mînâda gösterince mey-i hoş-güvâr mevc
Sâmî kenâr-i safhaya ‘anber-feşân olur
İzhâr idince bu gazel-i âbdâr mevc
Kayıt Tarihi : 3.6.2016 13:30:00





© Bu şiirin her türlü telif hakkı şairin kendisine ve / veya temsilcilerine aittir.

Bu şiire henüz hiç kimse yorum yapmadı. İlk yorum yapan sen ol!