İhanet Şiiri - Dr İlhame Müslümova

Ən bahalı qumaşlara bükələr,
Qabağına dünya malın tökələr,
Bundan belə hər nazını çəkələr..
Bu ürəyi ovudarmı? Ovutmaz…

Aləm gələr, el yığılar tüstünə…
Qürur durar bu sevginin qəsdinə…
Dənizləri gətir boşalt üstünə,
Xəyanəti soyudarmı…soyutmaz…

İstəyərsən başı işə qatasan,
Fikirləri düşüncəndən atasan…
Gecələri hamı kimi yatasan…
Xatirələr uyudarmı… uyutmaz…

O qürur da göydən yerə enəcək,
O inad da nə zamansa sönəcək…
Bütün hisslər bir gün geri dönəcək…
Güvən getsə qayıdarmı… qayıtmaz…