Gözümün önündesen Şiiri - Sevinc Arzulu

Göydə şimşək tək çaxsam,
Yerə sel olub axsam.
Haraya dönüb baxsam,
Gözümün önündəsən.

Sən getdin məndən əvvəl,
Şeh olar çəndən əvvəl.
Kim gələr səndən əvvəl,
Sözümün önündəsən.

Fərəhi dandırar ki,
Nadanı qandırar ki..
Yoxluğun yandırar ki,
Közümün önündəsən.

Görəcəyəm qəbrini.
Yarəb, vermə cəbrimi.
Əskik etmə səbrimi,
Dözümün önündəsən.

Bacı-qardaş gələrdin,
Əldə şabaş gələrdin.
Hamıdan baş gələrdin,
Özümün önündəsən.