Dostun seheri Şiiri - Sevinc Arzulu

Qiymətli varlığın sərrafı olub,
Ovçu qızılquşun səyyadı olub.
Könlüm gecələrin səyyahı olub,
Gəzir gəzir asta-asta qədim şəhəri.

Gecələr qarışıb al gündüzlərə,
Eh, nədən düşməyir ağ gün düzlərə.
Dönmək istəmirdi payız bizlərə,
Ayağı altına sərdim bəhəri.

Axtarıb özümü sənicə tapdım,
Xar zalım qızının əlindən qapdım.
Sənə doğru gələn yollarla çapdım,
Elə özüm kimi gərdim kəhəri.

Ildırım səmada çaxanda bildim,
Yer-göyü yandırıb yaxanda bildim.
Yaşarmış gözünə baxanda bildim,
Ah, necə ağırmış hicrin qəhəri.

Dan yeri ağarıb tezcə sökülsün,
Masmavi göylərdən sevinc tökülsün.
Istərəm həmişə desin və gülsün,
Fərəhlə açılsın dostun səhəri.