Çaya dönmüşüm Şiiri - Sevinc Arzulu

Qalmışam həsrətin məngənəsində,
Sonadək sıxılan yaya dönmüşəm.
Qulağım vüsalın yox kəlməsində,
Toy ikən qüssəli vaya dönmüşəm.

Adımı anırlar xoş günlərində,
Ayrılıq zalımdan boş günlərində.
Quru günlərində, yaş günlərində
Əlçatmaz, ünyetməz aya dönmüşəm.

Sevincəm, kədərim coşar, çağlayar,
Fərəhin yolunu hicran bağlayar.
Elə həzin-həzin, asta ağlayar
Səhraya yol açan çaya dönmüşəm.