Bu dünya Şiiri - Sevinc Arzulu

Ox atdım, yayım çatmadı,
Gününə ayım çatmadı.
Hayladım, hayım çatmadı.
Bu dünya yorğundu yaman.

Hər addımı izlənər ki,
Xəyanətdə bizlənər ki.
Bəzən elə gizlənər ki,
Bu dünya oğrundu, aman.

Azalmaz ki ilanların,
Bağlı döngə-dalanların.
Üzə durar yalanların,
Bu dünya doğrundu, zaman.

Saçları ağ.Dənim kimi,
Gəncliyinə qənim kimi.
Qocalıbdır mənim kimi,
Bu dünya solğundu, saman.
23.09.2020.