Bizi üsteleyib Şiiri - Sevinc Arzulu

BİZİ ÜSTƏLƏYİB

Acı söz çıxmaz dilimdən,
Pay verərəm dürr-ləlimdən
Yaxşılıq gəlir əlimdən,
Yaman bizi üstələyib.

Qapımızı döyər mələk,
Sağ əlində bəyaz lələk.
Verməz üzü dönmüş fələk,
Aman, bizi üstələyib.

Nədən çıxır eh, başları,
Yığdıqları qəm daşları.
Bilirəm ki o qaşları,
Kaman bizi üstələyib.

Hanı qara səmənd atlar,
Yoxluğunda igid çatlar.
Qeyb olubdur yaşıl otlar,
Saman bizi üstələyib.

Misradan şeir almışıq,
Sözləri gizlin çalmışıq.
Həyatdan geri qalmışıq,
Zaman bizi üstələyib.