Bir Şuşa nisgili Şiiri - Sevinc Arzulu

Gəzim qarış-qarış doğma diyarı,
Dururmu köksündə xatirəm barı?
Şuşanın telləri dağların qarı,
Yamyaşıl libası özüm seçim də.
Bir Şuşa nisgili vardır içimdə.

Qırılsın düşmənin əli-ayağı,
Əbədi məhv olsun dostu-dayağı.
Sürüm karvanımı sarban sayağı,
Min-min şəhid ruhu gedər köçümdə.
Bir Şuşa nisgili vardır içimdə.

Könlümün ən yaxın nöqtəsi Şuşam,
Dünyaya Tanrının diqtəsi Şuşam.
İlahi eşq adlı qitəsi Şuşam,
O gözəl məkandan min yol keçim də...
Bir Şuşa nisgili vardır içimdə.

Dayanıb dururam, dolub dururam,
Saralmış gülləri yolub dururam.
Özüm də bir şəhid olub dururam,
Əsgər paltarında, hərbi biçimdə.
Bir Şuşa nisgili vardır içimdə.

Ağrısı-acısı azalıb getsin,
Qaranlıq günləri sozalıb getsin.
Çovğunlu qışını yaz alıb getsin,
Isa bulağından buz su içim də.
Bir Şuşa nisgili vardır içimdə.
27.10.2017