Başdan atammadıq Şiiri - Sevinc Arzulu

Tanrı salmaz bizi yada,
Qəm-kədər həddən ziyada.
Vüsal atlı, biz piyada
Qaçdıqsa da çatammadıq.

Gülüm, sil gözün yaşını,
Qüssədən çatma qaşını.
Hamərd hicranın başını,
Daş-qaşla da qatamaddıq

Ayrılıq-kədər dənizi,
Tez soldurar gül bənizi.
O qədər üzdü qəm bizi,
Şirin röya yatammadıq.

Sevgim atəş közlü imiş,
Ürəyim şeir-sözlü imiş.
Vüsal gölü duzlu imiş,
İstəsək də batammadıq.

Gülüm, bu vaxtsız sevdanı,
Qızıldan taxtsız sevdanı,
Bizim tək baxtsız sevdanı,
Niyə başdan atammadıq.