Âgûş-i Dest-i Nâtıkada Tîşedür Zebân

Âgûş-i dest-i nâtıkada tîşedür zebân
Kâvişger-i defîne-i endîşedür zebân

Vasf-i lebünde neş’e virür bâde-i suhan
Sâkî kalem piyâle dehen şîşedür zebân

Tarh-efgen-i nukûş-i nihân-hâne-i hayâl
Üstâd-i çîre-dest-i hikem-pîşedür zebân

Miftâh-i kufl-beste der-i dahmegâh-i ‘aşk
Vâ-sâz-i perde-i dil-i pür-rîşedür zebân

Geh merhem-i şikâf-i derûn üzre çîre-bend
Gâhî hizebr-pîşe-i der-bîşedür zebân

Târ-i nefes keşîde-i tanbûr-i sînedür
Mızrâb-i nev-terennüm-i endîşedür zebân

Bu nahl-i âbdâr-i berûmend-i nazmuma
Sâmî zemîn-i tâzede çün rîşedür zebân