Zamin olmadı Şiiri - Sevinc Arzulu

Çətinliyə sinə gərdim,
Önündə ər oğlu ərdim.
Əziz dostum,mənim dərdim,
Qəmin olmadı, olmadı.

Həyatın çox özəl keçdi,
Şeir keçdi,qəzəl keçdi.
Uşaqlığın gözəl keçdi,
Kəmin olmadı, olmadı.

Nə var zülmətdən qaçmağa,
Ya günəş tək nur saçmağa
Məhəbbətdən söz açmağa,
Zəmin olmadı, olmadı.

Gah vuruldun qağayıya,
Gah gördüyün ağ ayıya.
Möhtac oldun bir qayığa,
Gəmin olmadı, olmadı.

Yaman düşüb gözü sənə,
Od salacaq közü sənə.
Deyən tale özü sənə,
Əmin olmadı, olmadı.

Nifrətimi PUA etdim,
Gülləsini şüa etdim.
Eh, nə qədər dua etdim,
Amin olmadı, olmadı.

Eh, ay Sevinc, azca danış,
Olacaqlar sənə tanış.
Düşdüm borca.Nə dost, tanış
Zamin olmadı, olmadı.