Yuxuma gelmirsen Şiiri - Sevinc Arzulu

Elə istəyirəm mən görəm səni,
Bəs niyə yuxuma gəlmirsən,ata?
Alıbdır qoynuna dərdi-qəm məni,
Bəs niyə yuxuma gəlmirsən,ata?
Mənimlə birlikdə gülmürsən,ata.

Gec-gec görüşsək də mehriban idik,
Ikiyə bölünmüş iki can idik.
Çətində həm arxa,həm həyan idik,
Bəs niyə yuxuma gəlmirsən,ata?
Aradakı səddi dəlmirsən.ata.

Şad günümüz toydur,bəd günsə vaydır.
Yoxluğuna inanmıram,bir aydır.
Bu yay nə ağırdır.nə qara yaydır,
Bəs niyə yuxuma gəlmirsən,ata.
Niyə göz yaşımı silmirsən,ata.

Göz yaşlarım selə dönüb axacaq,
Baxışlarım şimşək olub çaxacaq.
Sənsizliyin hey yandırıb yaxacaq,
Bəs niyə yuxuma gəlmirsən,ata.
Matəmi,hüzünü görmürsən,ata.

Sən apardın ürəyimin sevincin,
Mən idim sədəfin,mən idim incin.
Yadından çıxmırsan qızın Sevincin,
Bəs niyə yuxuma gəlmirsən,ata.
Niyə həsrətimi bilmirsən,ata.