Yollar yoruldu axı Şiiri - Sevinc Arzulu

Qurban yazı yazana,
Sevdasında azana.
Sənə doğru uzanan
Yollar yoruldu axı.

Səhraya axar çaylar,
Canlılara su paylar.
Gör keçdi neçə aylar,
Illər sovruldu axı.

Gecələri aylayan,
Gündüz nəzir paylayan,
Hey səni haraylayan
Dillər qovruldu axı.

Tanrı bizə bəxş edir,
Sonaları rəqs edir,
Güzgü kimi əks edir,
Göllər duruldu axı.

Uzaq durma əməkdən,
Qaçma dosta köməkdən.
Həsrətini çəkməkdən
Tellər buruldu axı.

Daş dəyibdir harana,
Məlhəm olum yarana.
Sərin dağdan arana,
Ellər sürüldü axı.