Yatmış vicdan Şiiri - Sevinc Arzulu

Yatanları oyadar,
Xoruz öz banı ilə.
Dünyanı al boyadar,
Səhər ilk danı ilə.

Gecə yanar işıqlar,
Zülmətə yaraşıqlar.
Sevgisini aşiqlər,
Hiss edər canı ilə.

Xəyallarda azıram,
Görüşünə hazıram.
Axtarıram, gəzirəm,
Arazın yanı ilə.

Bilməm nə olub mənə,
Düşmüşəm duman-çənə.
Məktub yazıram sənə,
Qəlbimin qanı ilə.

Yalançı plan qurar,
Varlığı heçə vurar.
Bir gün üz-üzə durar,
Yatmış vicdanı ilə.