Yalan dünyadı Şiiri - Sevinc Arzulu

Acı etdi şirin,meyxoş təmimi,
Tez batırdı dəryada qəlb gəmimi.
Heç olmadıq biz onunla səmimi,
Əzizimi əldən alan dünyadı,
Dünya yalan,dünya yalan dünyadı.

Olammadım mən məhəbbət timsalı,
Ayağımı yandırdı qəm qumsalı.
Çox gördülər bizə şirin vüsalı,
Aralığa həsrət salan dünyadı.
Dünya yalan,dünya yalan dünyadı.

Hicran aramızda eşqə qənim tək,
Qüssə də bir tüldür duman,çənim tək.
Kədərli anımda deyən mənim tək,
Əlçatmaz xəyala dalan dünyadı.
Dünya yalan,dünya yalan dünyadı.