Xweşika Min, Rindika Min Şiiri - Zandar ...

Demên sarî tifika min
Ji xweşiyê neynika min
Çi tu qencî nazika min
Xweşika min rindika min

Rojên tengasî bêhna min
Meyşîra li ber têhna min
Rengên pênûsa wêna min
Divêna min rûdêhna min

Siltana birca warê min
Her sivikî ya barê min
Tu bersiva hawarê min
Li emrê min yek karê min

Şêrîna ser zimanê min
Avjîna li rewanê min
Mirxa li nav bistanê min
Dermanê min caxanê min

Li can can û cananî tu
Rengê jîn û jiyanî tu
Hingivê ser zimanî tu
Hênzanî tu rêzanî tu

Li rêyê xweş havalî tu
Her delala delalî tu
Rozîya ji celalî tu
Hîlalî tu şepalî tu

Çiqasî xweş mizgînî tu
Ji bo bahar berfînî tu
Roşen û cejn û înî tu
Vejînî tu her jînî tu