Xudayar Şiiri - Sevinc Arzulu

Ey uca Tanrının ulu qüdrəti,
Uzaq et xalqımdan daha zilləti.
Ağlatdı yoxluğu bütün milləti,
Işıq tək dünyamdan keçdi Xudayar.

Tərifdən utanıb tez qızarardı,
Vurduğu zəngulə hey uzanardı.
Müğənni olsaydı toy qazanardı,
Şəhidlik adını seçdi Xudayar.

Ən böyük arzuya, murada yetib,
Yaralı olda da qabaqda gedib.
Nifrəti əlində bir oraq edib,
Düşməni zəmi tək biçdi, Xudayar.

Gücünü sevdiyi vətəndən alıb,
Əzmiylə dağlara yol, cığır salıb.
Neçə gün döyüşdə ac-susuz qalıb,
Şəhidlik şərbətin içdi, Xudayar.

Şəhid ruhlarının içində azıb,
Düşmənə çıxılmaz daş məzar qazıb.
Vətən tarixinə min dastan yazıb,
Səsiylə qəlblərə köçdü Xudayar.