Xatire ordun Şiiri - Sevinc Arzulu

XATİRƏ ORDUN

Qəm notu sarı simin,
Sözlərimə çökülər.
Mavi göz yaşı kimi,
Cüt didəmdən tökülər.

Qaralıb pərdə-pərdə,
Göy üzünün qurşağı.
Bir boylan hərdən-hərdən,
Ay mənim yumuşağım.

Qızların ən gözəli,
ən göyçəyi mən idim.
Qəlbinin ən ağrılı,
Dərd göynəyi mən idim.

Ay mənim işıq üzlüm,
Ay mənim nur simam, gəl.
Sənsiz necə bomboşdur,
Qaranlıq asiman, gəl.

Saatları dayanmış,
Şəhərin sakiniyəm.
Yatanları oyanmış
Səhərin sakiniyəm.

Sakiniyəm bu yerin,
Sakiniyəm bu yurdun.
Məni rahat qoymaz ki,
Sənin xatirə ordun.
26.04.2018