Xalı görünür Şiiri - Sevinc Arzulu

Xəbərdar deyiləm macərasından,
Baş aça bilmirəm şəcərəsindən.
Mənim ürəyimin pəncərəsindən,
Onun ürəyinin zalı görünür.

Ocağım istidir, kül-köz dolusu,
Ətrafı tüstüdür, sirr-söz dolusu.
Seyr edək Vətəni biz göz dolusu,
Çiçəkli yamacı, yalı görünür.

Yenə günəş doğur, yurda nur saçır,
Qönçə qızılgüllər nurundan açır.
Ən yaxın munisin əhdndən qaçır,
Geriyə oxudur valı, görünür.

Göz nuru çilənib şerin sətrinə,
Misralar bürünüb çiçək ətrinə
Sən Allah, heç dəymə yarın xətrinə,
Elə ilk baxışdan halı görünür.

Danışa bilməyir düzü, qəhərdən,
Qaraldıb qanını kimsə səhərdən.
Bilirsən, əzizim, erkən baharda,
Hələ ki meyvənin kalı görünür.

Sevgili yarına zülüm edənin,
Ruhsuz qalacaqdır bir gün bədəni.
Yarı əbədilik qoyub gedənin,
Gözünə dünyanın malı görünür?

Deməyin siz qonaq, qərib laləyə,
Çiçəklər qol-qanad gərib laləyə.
Baxın al geyinmiş zərif laləyə,
Gözəllik bəxş edən xalı görünür.