Were Em herin Zozanan Dilber

Ji deng û gemara evan bajaran
Were em herin zozanan dîlber
Ji kîn û kerba evan dilsaran
Were em herin zozanan dîlber

Herin zozanan nav bexçê hêşîn
Li vêra tune bihar û havîn
Quncikê cinnetê ka wer tu bibîn
Were em herin zozanan dîlber

Li bin konê reş vexwin tasek av
Hênikin dil û cîger û hinav
Li pêy terşê xwe herin gav bi gav
Were em herin zozanan dîlber

Çîyayê Sîpanê ra em bibin mêvan
Serê xwe deynin ser tat û latan
Warê xecê ra bibên niştiman
Were em herin zozanan dîlber

Herin Behra Wanê nav qaz û qulingan
Derkevin nêçîrê bi tîr û tivingan
Mest bibin bi seyra şêr û pilingan
Were em herin zozanan dîlber

Pêxwas dibê em dilê xwe şa bikin
Miskînîyê em ji ser xwe ra bikin
Warê xwe li zozanan ava bikin
Were em herin zozanan dîlber

FİKRÎ AMEDÎ