Vurma beni Şiiri - Sevinc Arzulu

Baxma mənə gizlin, oğrun,
Başlamasın sual-sorğun.
Illər yaman məni yorğun,
Sən üstəlik yorma məni.

Yaşla öyünməz olmuşam,
Qəlbi döyünməz olmuşam.
Sənçün görünməz olmuşam,
Özgəsindən sorma məni.

Tutammazsan əli, külək,
Deyilsən ki zəli,külək.
Yavaşca əs, dəli külək,
Burum-burum burma məni.

Çənəm, dağa çökülmüşəm,
Evəm,himdən sökülmüşəm.
Çoxdan sınıb tökülmüşəm,
Eh, yenidən qurma məni.

Vüsal məndən aralıdır,
Günüm ağlı-qaralıdır.
Dəli könlüm yaralıdır,
Aman ovçu, vurma məni.