Vulkan kimiyim Şiiri - Sevinc Arzulu

Dünya gəlir rəngsiz mənə,
Həyat yoxdur sənsiz mənə.
Yaxınlaşmayın siz mənə,
Püskürən vülkan kimiyəm.

Əlimdə var mey, gedirəm,
Sanki gəlir ley, gedirəm.
Baş götürüb hey gedirəm,
Sahibsiz sükan kimiyəm.

Soyuq əsdi şərq küləyim,
Ürəkdə qaldı diləyim.
Özümə çatmır köməyim,
Özgəyə imkan kimiyəm.

Demirəm böyük dühayam,
Nə ucuzam, nə bahayam.
Yalqızam, mən.Təktənhayam,
Atılmış məkan kimiyəm.

Eşidərsiz səsimi tək,
Əsərəm yaz nəsimi tək.
Mən də babam Nəsimi tək,
Dostum, laməkan kimiyəm.