Veten kimisen Şiiri - Sevinc Arzulu

Səni salamlaram,dostum, ürəkdən,
Danışaq doyunca arzu-diləkdən.
Alırsan rəngini güldən-çiçəkdən,
Yaşıllıq içində bitən kimisən.

Həsrətin başına düşsün qara daş,
Vüsal yol almasın yad limana kaş.
Donub gözlərimdə parıldayan yaş,
Uzaq sahillərdə itən kimisən.

Hər sözün üstündə yarpaq tək əsim,
Sənsən gedib-gələn isti nəfəsim.
Hərdən qulağıma gəlir bal səsin,
Bülbül tək gülzarda ötən kimisən.

Üzümü tuturam qadir Allaha,
Araya ayrılıq düşməsin daha.
Məni qoymamısan heç zaman tənha,
Hayıma anında yetən kimisən.

Vüsalın dostudur sevgi, məhəbbət,
Içirtmə vüsala çox acı şərbət.
Vətəndə sən mənə bir azca qürbət,
Qürbətdə bölünməz Vətən kimisən.