Üz-üzeyik Şiiri - Sevinc Arzulu

Qocaldıqca uşaqlaşaq,
Qüdrət ilə üz-üzəyik.
Tezcə burdan uzaqlaşaq,
Həsrət ilə üz-üzəyik.

Zirvəsi ağ qarlı olaq,
Bağ- baxçası barlı olaq.
Biz də xalq tək varlı olaq,
Sərvət ilə üz-üzəyik.

Qəm gülünü əkəmmərik,
Dərd yağışı tökəmmərik.
Sonunacan çəkəmmərik,
Möhnət ilə üz-üzəyik.

Vüsal hissi qəlbdə yatıb,
Hicran onun başın qatıb.
Bu görüşün sonu çatıb,
Qürbət ilə üz-üzəyik.

Ürəyim eşq e`tiqadlı,
Vüsal kimi şirin dadlı.
Gülüm, indi sevgi adlı,
Hikmət ilə üz-üzəyik.