Üreyin senin Şiiri - Sevinc Arzulu

Gələ bilməyirəm,yol uzaq olub,
Qış gəlib,qar yağıb,eh, sazaq olub.
Sənsiz tənha qalıb, yalquzaq olub,
Qanadlı kəpənək mələyin sənin.

Gah məşriq olmusan, məğrib olmusan,
Dağlar tək azadə, məğrur olmusan.
Indi Əzrailə məğlub olmusan,
Yerəmi dəyibdir kürəyin sənin.

Gizli göz yaşları dönübdür şehə,
Fələyə verilən zamansız behə.
Mən həsrət qalmışam azacıq mehə,
Nədəndir əsməyir küləyin sənin.

Diksindim quşların qaqqıltısına,
Saatın dayanmaz çaqqıltısına.
Həsrətəm qəlbinin tıqqıltısına
Əbədi dayandı ürəyin sənin.