Üreyime qar yağır Şiiri - Sevinc Arzulu

Vəslin yolu dümdüzdür,
Gecəsi də gündüzdür.
Sinəm elə bumbuzdur,
Ürəyimə qar yağır.

Qurdun həsrət səkisi,
Nə Bakısı, Şəkisi.
Bir gəlməz ki çəkisi,
Ayrılıq qəmdən ağır.

Dağ görmüsən qayasız,
Alver olmaz mayasız.
Həsrət, hicran həyasız,
Vüsal yazıq çox fağır.

Çətin gözdən itərəm,
Yolun üstdə bitərəm.
Harayına yetərəm,
Dar gündə məni çağır.

Önümdə ağ lövhədir,
Söz şairə töhfədir,
Xəyalların körpədir,
Buludlardan süd sağır.