Unutmadım ki. Şiiri - Sevinc Arzulu

Qaraca gözlərdə nəmi unutdum?
O sirrli-sehirli dəmi unutdum?
Kədəri unutdum, qəmi unutdum?
Mən səni sevməyi unutmadım ki.

Gecənin gözündən yuxu tökülüb,
Gündüzün üzünə duman çökülüb.
Özgəylə danışıb, özgəylə gülüb,
Sənsizlik dərdimi ovutmadım ki.

Soruşma ayrılıq bizə neyləyib,
Həsrətin bəmbəyaz gülün iyləyib.
Günəşin nurunu yaylıq eyləyib,
Axan göz yaşımı qurutmadım ki...