Ümid qapısında Şiiri - Sevinc Arzulu

Hər bir arzu kiçik ulduz,
Yolu olsun açıq, dümdüz.
Dərddən bezib gecə-gündüz,
Yatdım ümid qapısında.

Yaşayırıq bala-bala,
Dəbdən geri qala-qala.
Ağı göyə, göyü ala,
Qatdım ümid qapısında.

Nə deyim qəlb umanıma,
Dostmu oldu gümanıma.
Hicrin qatı dumanına,
Batdım ümid qapısında.

Axtarıram güclüsünü,
Sınayıram öclüsünü.
Hicranın daş mücrüsünü,
Atdım ümid qapısında.

Musiqili tonundaca,
Bəyaz, ipək donundaca.
Deyən vəslə sonundaca,
Çatdım ümid qapısında.