Toxunma, gülüm Şiiri - Sevinc Arzulu

Zaman qəlb oxşayan min nağıl deyər,
Dostların hərəsi bir ağıl verər.
Əl vursan, titrətsən bil, ağı deyər,
Könlün qəlb siminə toxunma, gülüm.

Ürəyə ruh verən sərin nəsim ol,
Könüllər oxşayan bir sarı sim ol.
Tək mənə açılan sehr, tilsim ol,
Hər yoldan ötənçün oxunma, gülüm.

Bir həzin, bir şirin lirik kəlməsən,
Arzumdur həsrətin dadın bilmə sən.
Mənim qəlb xalımda zərif ilməsən,
Özgə gəbəsinə toxunma, gülüm.