Tonqal çatır Şiiri - Sevinc Arzulu

Odur məhəbbətin ası,
Əskik olmaz heç duası.
Al günəşin lal şüası,
Gözlərimdə tonqal çatır.

Ulduzların axışından,
Qara-bəyaz naxışından.
Sənin soyuq baxışından,
Ürəyimə tikan batır.

Cətin səma nurlaşacaq,
Segahlanıb Şurlaşacaq.
Eh, bir azdan gurlaşacaq.
Dolu hələ tək-tək atır.

Adı adlar içrə addır,
Dərdə, qəmə dostum, yaddır.
Elə nikbin, elə şaddır,
Kədərini kimə satır.

Azalmaz ki məhəbbətin,
Dildə gəzər sədaqətin
Göz önündə həqiqətin,
Sevinci qüssəyə qatır.