Tebriz Şiiri - Sevinc Arzulu

Xəyalımda birincimdi,
Dağ başında bir incimdir.
Şuşa mənim sevincimdir,
Təbriz adlı nisgilim var.

Ruh darıxar təndən ötrü,
Dağ qəribsər çəndən ötrü.
Qəhərlənir səndən ötrü,
Neçə-neçə sevgilin var.

Yatanlar da ayılacaq,
Düşmənlərin bayılacaq.
Dalğa-dalğa yayılacaq,
Bal tək şirin bir dilin var.

Görən sənə vurulacaq,
Toy mağarı qurulacaq.
Mütləq bir gün durulacaq,
Araz içrə çox lilin var.

Hey yağsa da qar yağışı,
Azalmaz ki gül alqışı.
Gedər ömrün soyuq qışı,
Yaz qoxulu ay-ilin var.