Tanrım oralarda Şiiri - Habil Yaşar 2

Tanrım oralarda yağışlar yağmır,
Orda adamların suyu quruyub.
Heç kəs heç bir kəsin üzünə baxmır,
Elə bil hər kəsin üzü çürüyüb.

Orda təbiətin rəngi də solğun,
Ağ-qara çəkilib meşələr belə.
Dəyəri bilinmir varlığın-yoxun,
Məhv olub ən gözəl dəyərlər belə.

Tanrım oralarda ürəklər soyuq,
Nəfəslər itirib hərarətini.
Zalımlar mərdlərin canına qıyıb,
Öldürüb oranın səadətini.

Orda çiçəklər də qoxusuzlaşıb,
Quşların uçmağa həvəsi yoxdu.
Yaşamaq o qədər maraqsızlaşıb,
Belə yaşamağın mənası yoxdu.

Ordan nə danışım, nə yazım sənə,
Özün ki, hər kəsdən yaxşı bilirsən.
Baxıb adamların əməllərinə,
Bəzən ağlayırsan, bəzən gülürsən.