Talan, gel Şiiri - Sevinc Arzulu

Ayrılığın zərbəsindən,
Qəmdən qaçıb dərdə sin də.
Könlümün şah pərdəsində,
Şən mahnılar çalan, gəl.

Naləmisən, fəryadmısan,
Doğmamısan, ya yadmısan.
Şirinimi çox dadmısan,
Ay acılıq alan gəl.

Təzə demə boyatıma,
Qara çəkmə bəy atıma.
Mənim sakit həyatıma,
Minbir rəxnə salan gəl.

Boyu uzun, teli daray,
Açıqlansan salma haray.
Var-dövlət yığdığın saray,
Çoxdan olub talan, gəl.

Azaldarlar çəkimizi,
Artırmazlar təkimizi.
Bax, bu yolda ikimizik
Yoxdur dərdə qalan gəl.