Talan,a dünya Şiiri - Sevinc Arzulu

Bir oda tikmişəm küncsüz, bucaqsız,
Körpələr yatmaz ki isti qucaqsız.
Necə ki yandırdın odsuz-ocaqsız,
Səni də alova qalan, a dünya.

Bəlkə azaldasan sual-sorğunu,
Məhkəmə etmə gəl könül oğrunu.
Bu qara sevdanın sözü doğrumu,
Həqiqət bir az da yalan, a dünya.

Kiminsə göz yaşın içib doyursan,
Kiminin zəmisin biçib doyursan.
Kimini əbədi tənha qoyursan,
Tək qalsın sənin də balan, a dünya.

Daha da əzərsən cismən cansızı,
Sevib əzizlərsən namərd qansızı.
Hər tərəf yaşıldır, hər yan qırmızı,
Qara rəng açılır lalan, a dünya.

Yaxşının yaşamın boran etmisən,
Yamanı şişirdib tiran etmisən,
Necə ki ömrümü viran etmisən,
Səni də olasan talan, a dünya.
08.05.2019