Sulduzum Şiiri - Sevinc Arzulu

Atasının bir dənəsi,
Anasının dürr danəsi,
Sevər, əzizlər nənəsi,
Babanın şəkəri, duzu
Sulduzum.

Sərrast deyər sözlərini,
Alışdırar közlərini.
Yerə dikməz gözlərini,
Seyr edər göydə ulduzu,
Sulduzum.

Yolunu gözlər ocaqlar,
Darıxmırmı künc-bucaqlar?
Oğlum, məni bərk qucaqla,
Tez ərisin qarım, buzum
Sulduzum.

Sən Elgizin qardaşısan,
Yaxın dostu, sirdaşısan.
Dünyamızda çox naşısan,
Mənim körpə, dəcəl quzum.
Sulduzum.

Fərəhimin xəyalısan,
Utancaqsan, həyalısan.
Ayaqları sayalısan,
Artsın günü-gündən ruzum,
Sulduzum.
14.11.2017