Sözüm, Ata Şiiri - Sevinc Arzulu

Gəlib çatdın son mənzilə,
Sənə qurban özüm, ata.
Hansı əl göz yaşım silər,
Sənə qurban özüm, Ata.

Yoxluğuna inanmıram,
Sədaqətdə sınanmıram.
Ayrılığı danammıram,
Közərəcək közün, Ata.

Hiss etmirəm, yaram isti,
Acı yellər bizə əsdi.
Ölüm qarşımızı kəsdi,
Hicran oldu bizim, Ata.

Ölüm vüsala yetsə də,
Qəbrin üstdə gül bitsə də.
Hamının izi itsə də,
Itməyəcək izim, ata.

Sənsiz çətin dayanaram,
Şam təkin oda yanaram.
Həmişə səni anaram,
Budur sənə sözüm, Ata.