Söz qaşları Şiiri - Sevinc Arzulu

Bir günlük atalı-analı olum,
Düyünlük qönçəli-butalı olum.
Ömürlük günahkar, xatalı olum,
Bələnim səmanın göz yaşlarına.

Hicranın qapısın döyüm astaca,
Həsrəti yalandan öyüm astaca.
Gedib qulağına deyim astaca,
Bir çarə tapsınlar öz başlarına.

Zülmətdən gecənin rəngi çıxılsa,
Ulduzlar ayağım altda yıxılsa,
Dünyanın dövləti-varı yığılsa,
Bərabər olarmı söz qaşlarına.