Son namaz Şiiri - Sevinc Arzulu

Fələk, az çək sən eşməni,
Qurutdun həyat çeşməni.
Məhv olsun qarı düşməni,
Gözdə qoydu murazını.

Azalmayan çən, ahına,
Açılmayan sabahına,
Yaxın oldun Allahına,
Qıldınmı son namazını.

Atan adın Cavid qoydu,
Ürəyinin başın oydun.
Gənc yaşında şəhid oldun,
Görmədin ömrün yazını.

Diləyirdi sizdən imdad,
Qarabağım oldu azad,
Əmanətdir qoşa övlad,
Yaşadın hissin azını.

Səninçün sökülməz o dan,
Bir muzeydir indi odan,
Ölümündən sonra medal...
Fələk yazıb bu yazını.