Sirên Veşartî Şiiri - Xizan Şîlan

bi sernermî rastiya sirên veşartî qal dikim li ser giyana şevên mesûm êşa tenêtiya kambax dibare mizawiran bi dek û dolabên xwe li ser min bi ziman bûn tovên jana striyan li temenê min çandin di hewşa mala min de sifreya har raxistine çarenûsa min li peravên konçala tenha hat terkandin kaniya zanistiyê di kendalên mêjiyê min re bi xuşexuş diherike kulîlkên gotina fazîletê di lerza dest û piyên min de geş dibin ez li ser axa bav û kalan mişextî jana diyarên xerîb bûm di şewqa çira odeya xwe de demborî me li reştariya goristanên bêdeng mayînde me li sibehên sergêj hêlîna xwe di xemgîniya tava rojê de ava dikim li şevbihêrkên serxweş pişta xeyalên stûxwar mizdidim di meraqa valahiya asîman de mirovekî bargiran im dîwarê koşka zaliman bi saya eşqa pêxemberan hildiweşînim baskên helbesta xwe ber bi asta ramanên herî bilind ve diçirpînim li ser pira bîranînan toza gunehkariya wijdan dadiweşînim deftera hestên tolhildanê vediçirînim dilreşiya virek û hesûdan di xweşbîniya xwe de dibexşînim zencîrên koletiya nefsê di azadiya mantiqa xwe de diqetînim û dişkênim Xizan Şîlan 2012-04-24 Stockholm